by tone | 11 أكتوبر, 2017 11:50 م
.
امي دخيلك طار فستاني
وتفرجوا العالم عسيقاني
واحترت ياأمي شو أعمل فيه
خبيت حالي بطرف جزداني
بس في صبي شهم وحلو سبحان
من أرسلو سوري او بناني
نزل معي الفستان لما طار
وغمض عيونو ومشي وخلاني
وراحت ورحنا وكرجت الأيام
ماعدت شفتو لهيك زعلاني
يمكن يا أمي صار شب كبير
ويمكن خطب لبنت عشقاني
شو كان اسمو نسيت والله نسيت
مكتوب اسمو بقلب الخزاني
حزرك ياامي رح يجي ويمر
وتوبي الهوى رح يرفعو تاني
رح أنطرو ساعه على الشباك
لو شافني مالحق ينساني
هيدا خيالو عم يجي وبيروح
ياويل قلبي انكنت سهياني
ولفيت عن راسي طراف الشال
ولوحتلو بالشال عشماني
أنو يشوفو ومايرد عليه
بس بالوهم ماضل غرقاني
وبعدين يلا رد يلا رد
دقات قلبي فيك علقاني
يلعن أبوك انكنت مابترد
ولك من غرامك صرت هلكاني
تبسم ولوحلي بإيدو هيك
ويمكن غمزني بعين دبلاني
بس أنا ماحسيت كيف نزلت
ولا عرفت كيف لبست فستاني
يارب يجي الهوى من أيلول
ويطير هالفستان منشاني
بلكي بقرب هالحلو المهيوب
وبضمني وبيشوف رماني
ومن لهفتو بيبوس شفاتي
ويحط نقطة عسل علساني
Source URL: https://kfarbou-magazine.com/issue/11189
Copyright ©2024 مجلة كفربو الثقافية unless otherwise noted.