جابت ولادا ونزلت توزع صور
ومرت عليي قلت هالورده لكي

ماعرفت انو حبها بقلبي انحفر
ولافهمت ليش الناس بتزيد الحكي

هدّت عليي قال جايي تشتكي
وفهمت من دمعاتها شوية بكي

قال الصبي ابني ملطّش بنتها
وقايل عليها هالبنت شو متكتكي

وابني مسافر من سنه برا البلد
ايمت اجا ولطّش ع بنتك هالحكي

تاري بعتها الشوق وحكاية زمان
بس بدها حجه وعليها ترتكي

منشان برّد خلقها مسكنا صبي
من بين هالصبيان وقلتلا سفكي

قالت مابدي بس نبه لي عليه
مايعود يحرجها وتجيني ملبكي

طالع لبيو أزعر وقلبو حنون
شو نسيت كم مره علقنا بمعركه

وهيه ضرب مته لتمك هالحلو
روقي قعدي حدي القضيه مشربكي

وقعدت وتحت لسانها كومة كلام
ولزت عليي وبلشت بالحكوكي

وصارت شبر ضحكاتها بتما الحلو
والسهسكي جرت وراها السهسكي

ولك طلعت الجيران عاصوت الضحك
ونسِيت انو عيب شغل الفزلكه

ورجعت للماضي ولأيام الهوى
ولقيتها لسا بقلبي مجعلكي

تاري انا مانسيت هالحب القديم
ولا نسيت ايام الشقا واللكلكي

ولا نسيت شو خبيتها بيوم الشتي
تحت العبايه وصار لونا ليلكي

وضميتها سكتت وماقالت حرام
وبوستها دابت سألتا شو بكي

قالت مافيني شي بوّسني كمان
يلعن أبو الشيطان شو إنو ذكي