الاثنين 1يناير 2024: هيئة التحرير وادارة موقع المجلة تبارك للجميع بحلول عام جديد متمنين لكم عاما مليئا بالخير والمحبة راجين من الله أن يعم السلام كل سورية ودمتم بخير ..  * 

يا شهيد العلم

(قصيدة زجل في رثاء الشهيد نبيه السعد)

 

يا شهيد العلم يا حي الضمير

                             كنت المنارة وبلسم جروحاتنا

معروف عنك بالمحبة للفقير

                             سالوا يا حسرة من الألم دمعاتنا

طيبك بحر والعقل عندك مستنير

                                  أكبر خسارة علمك اللي فاتنا

الأب المثالي كنت والزوج القدير

                               يا حيف موتك كان  من ويلاتنا

ولا يوم كنت تفكر بلبس الحرير

                                 ع الدوم بتقول العلم غاياتنا

 اغتالوا العلم يا حيف بالمال اليسير

                                 ولا يوم كان الغدر من عاداتنا

والما  بحب العلم في عقلو ضرير

                                للعلم دوم بتنحني هاماتنا

القرآن والانجيل حتى المزامير

                                تحرِّم علينا القتل بدياناتنا

نحنا أهل نحنا شراكي بالمصير

                                ولا يوم قدروا يفرقوا بيناتنا

واجب علينا صار تصحيح المسير

                              نرسم دروب الحب في دياناتنا

بوادي الفرات رجال عنا مشاهير

                              بيحافظوا بالدم ع كراماتنا

فراقك يا غالي كان ع كفربو مرير

                               بكيو الشباب وصرَّخو بنياتنا

ذكراك باقي للأبد علمك غزير

                               بتضل عايش للأبد جواتنا

دخلنا بهالأيام بمخاض العسير

                              رب الجلالة يستمع دعواتنا

كرامة وطن بالدم فيها بستجير

                               ما راح تغلى ع الوطن دماتنا

مثواك جنة ربنا فيها أمير

                               حتى الشفيع تكون لزلاتنا

لزور قبرك بالبرد والزمهرير

                               شمعات شعِّل    رتِّل بآياتنا

 

التعليقات: 3

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *