ع عيد هالميلاد موتك مو قليل

by tone | 30 يناير, 2013 10:11 م

[1]

 

 

(قصيدة زجل في رثاء الشهيدة نور شموط)

يا نور عرسك صار  مأتم للرحيل

                               بكيو عليك كبار سادتنا

بيك على العكاز ما بيملك بديل

                                   أمك بكت وكتير بكتنا

يا نور بيِّك صاح على موتك عليل

                               خسرنا يا حسرة اليوم ثروتنا

شباب وصبايا كتَّروا عليك العويل

                                صاحوا : أيادي الغدر صابتنا

نعش الطهارة حمل فستانك طويل

                              طرحات هالفستان حرقتنا

مهما بكينا البكى ما بيروي غليل

                                فيك القداسة رمز عفتنا

بصلِّي لالله بجود بالترتيل

                              والشمع يضوي في كنيستنا

ببحث عن الآيات بالانجيل

                                 هي الدوا   لتزيل كربتنا

دمَّك بهالسرفيس ما زالوا الغسيل

                              ع شهاتك قربان ضيعتنا

ع عيد هالميلاد موتك مو قليل

                                نغَّص علينا اليوم فرحتنا

كنت مشاعل نور تضوي ع الرعيل

                                 يا رب ما أكبر خسارتنا

دمَّ الحرائر ع الأرض ينبت نخيل

                                 بعتم الليالي يزيل ظلمتنا

ما في غنى يارب عنك مستحيل

                                خفف علينا من مصيبتنا

يا موت ع المؤمن ترى مانك بخيل

                            يا حسرتي   الأيام خانتنا

نحنا شعب بالأرض متجذر أصيل

                               ع محبتك   هالأرض ربتنا

Endnotes:
  1. [Image]: http://kfarbou-magazine.com/wp-content/uploads/نور-شموط-2نسخ-320x200.jpg

Source URL: https://kfarbou-magazine.com/issue/3107