بعيدك يا أمي الناس كلا مهلله

by tone | 28 مارس, 2013 1:35 م

[1]

 

طليت يا هالعيد بالظرف العصيب

والناس عم تعيش أسوء مرحله

أم الشهيد تولول تزيد النحيب

يا بني فديت الوطن ما في مشكله

مريم بكت ع ابنها الفادي الحبيب

ساعة ما غادرها ع درب الجلجله

يا أم يا أم الدني الغصن الرطيب

بعيش بالصحرا بأرض القاحله

شاعر إذا أبدع بوصفك أو أديب

ما بظن عامل بالكتابه مرجله

يا ريتني من ميمتي عايش قريب

في غربتي صعبه كتير المسأله

مهما اجمعت من مال بالمهجر غريب

مهما عمالك بالنجاح مكلله

عند الحقيقة بغربتك عايش كئيب

الغربة ع طول العمر ماهي محلله

يا بن الوطن كالأم ع صدرا الرحيب

بتكون بالأوصاف دوم مكمله

يا بعيد عن الأم لا تقلي نصيب

في أي لحظة فيك ترجع هروله

عايد يا أمي ع الوطن بعد المغيب

حامل غصن زيتون حامل سنبله

رح قبِّل ترابك الوطن سرو عجيب

قبل أياديك يا أمي الفاضله

واللي بيكسب رضا أمو شو لبيب

البيزعلا للأم عين البهدله

حب الوطن بقلوبنا هلال وصليب

بعيدك يا أمي الناس كلا مهلله

 

Endnotes:
  1. [Image]: http://kfarbou-magazine.com/wp-content/uploads/101_7811-copy-320x2007.jpg

Source URL: https://kfarbou-magazine.com/issue/3660