الاثنين 1يناير 2024: هيئة التحرير وادارة موقع المجلة تبارك للجميع بحلول عام جديد متمنين لكم عاما مليئا بالخير والمحبة راجين من الله أن يعم السلام كل سورية ودمتم بخير ..  * 

كيف الشهادة حملتا الله عليم

 

1375664_595730247136117_860766608_n

كل من قرأ الكتاب ما بظنز فهيم
ما هو مثقف لوعمل أكبر حكيم
بتشوف ناس كتير درست جامعه
كيف الشهادة حملتا الله عليم
ــــــــــــــــــــــ
بين الثقافة والشهادة مجادله
تا تجمع الأمرين بدها معادله
ما بظن كافي العلم دون مسآله
حتى الثقافه واقعه صاير أليم
ــــــــــــــــــــــــ
ابحث يا ابني بالكتب ع المعرفه
مهما تكون بحد ذاته مكلفه
لا تعيش في هالكون عيشه مزيفه
كل من شرب المدام ما بظنو نديم
ـــــــــــــــــــــــــــــــــــــــــ
عاشر أهل الكتاب رح تربح أكيد
وتكون صاحب رأي متواضع سديد
أقوى الحصانة بالعلم من هالحديد
بتضل بين الناس متنور وسيم
ـــــــــــــــــــــ
أهل الوفى عشاق في عمر الزهور
بيحلقوا وبيشمخوا متل النسور
والمايدوق الحب ما بيعرف سرور
ما بظن انو بيفهم وعقلوا سليم
ـــــــــــــــــــــــــــــــــــــــــــــــــ
محدود عمرك لا تعيش بشوشره
لا تكون قاسي لا تحب السيطره
خللي حياتك مثل شجرة مثمرة
تا يذكروك الناس ويقولوا عظيم
ــــــــــــــــــــــــــــــــــــــــــ

*************

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *