السبت 4 كانون الثاني 2020: موقع مجلة كفربو الثقافية يطلق العدد السنوي 2020م ضمن سلسلةاصداراته وكل عام وأنتم بخير...  * 

ست قصائد وجدانيات زجلية

1-

يسعد صباحك ياوطن
على عرشك الياقوت
بالرغم من كل الشّجن
هاالشعب مابيموت

ولو جار عليه الزمن
لو تهدّمت اليوت
لو فاضت عليه المحن
لو ماشي بالتابوت
يسعد صباحك ياوطن
الي من الدني بيطلع
بالليل لو زاد العتم
بيضل نجم يلمع
واالفجر مابيموت
ــــــــــــــــــــــــــــــــــ
2-
كبّرت …ماكبّرت
كل الحكي تبسمر
ع قد ماكبّرت
روح الطفل أطهر
ع الأرض شو تجبرت
الله ع ل تجبر
ع الورد كيف دعست
شو ضل بعد أكتر
باب السما مفتوح
والرب عم يسهر
قلبو صفي مجروح
وإيدو عليك أقدر
كبّرت ..ماكبّرت
الله عليك أكبر
ــــــــــــــــــــــــــــــــــــــــ
3-
حريّه
لا الريح عرفت شو بني
ولا البحر قادر يسبر غواري
والشمس قد ماتفرفدت
بتخجل من طلعتي وبتداري
والدني على وسعا ملبكي فيي
بتخاف يجتاحا إعصاري
يسعد أوقاتكن بدي تعليقات شعريه ع الصوره
ــــــــــــــــــــــــــــــــــــــــــــــــــــــ
4-
موجوع قلبي ياحلب
الله يحميكي
ياحلم مشغول بدهب
كل الحلا فيكي
بالبال طرزتك قصب
للفرح ضاويكي
شو بقول مرمرني التعب
وتا بوّسن ديكي
معقول يارب العجب
بكرا إذا حرقوا الدهب
يصيغوا الحلا ليكي
الله يحمي حلب وأهلنا بحلب

ــــــــــــــــــــــــــــــــــــ
5

جايي عبالي مزّق شبْاك القهر
ورفرف بهاالدني وطير لبعيد
مابعرف قديش رح غيب
يمكن دهر
يمكن رح ارحل وأولد من جديد
نحنا يارب الكون خلقنا من صفر
نقطه بسطر
وانت بحنانك بتعمر وبتزيد
اشلحني فراشه طارت بالفجر
شي طير سارح ماعرف تنهيد
اجعلني شي نقطة مي تمشي
بشي نهر
موال ضايع عل المدى يرد الصدى
ويعيد
ــــــــــــــــــ
6-
سجتلك قواس النصر
وزخرفت هالكلمات
بلكي يمر العصر
وماتنزل الدمعات
بالورد طوقت الخصر
وغفيت على النهدات
من الغيم ببنيلك جسر
ومن الشتي الحارات
ياريت لو حلمي انتصر
وسرقت هالنجمات
وزينت صدرك هالحلو
تاتخجل الساحات
وعملت لعيونك حرز
وسميتك دني
بلادي ياحلوة الحلوات
ـــــــــــــــــــــــــــــــــ

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *