قصيدة مين مننا ملاك؟

by wisam-mo | 31 مارس, 2014 9:21 م

[1]

 

قصيدة مين مننا ملاك؟
يا نفسي سيبك من الناس
وكفاية فكر وهموم
كل انسان ليه نزوة
في مجتمع محكوم
اي انسان بمعاصي
مهما يكون ما يكون
الغلط النهارده صح
امس كان ممنوع
يا نفسي عيشي وقتك
ليه الضمير محكوم
كتب علينا النفاق
نعيش بالف لون
مجتمع غريب كاذب
فيه الغلط مدفون
يعمل عليك واصي
يجرحك بكلام يقول
يكلمك كلام قاسي
عايزك ملاك تكون
يا نفاق انت مش واصي
انا وانت انسان
بلاش حكم ومواعظ
وانت عملك شيطان
يا قدوة سيبك مني
انا انسان خربان
كنت زمان في سني
عارف عنك اسرار
عارف تاريخ حياتك
كل ماضيك (…..)
وامبارح كنت في سهره
ياشيبه مع مين سهران
متهربشي وتمشي مني
وتقول عندك مشوار
اسمع الكلامي يا معلم
متقطعش تاني الحوار
سمعت ياعم القدوة
مالك شكلك عرقان
اكيد زعلان مني
عشان كشفت الاسرار
اسف ان كنت جرحتك
بعرفك انك غلطان
الفرق بيني وبينك
عمري ما لبست قناع
واضح بشكلي عادي
عمري ما هأدين انسان
بأغلط واعمل معاصي
انا حر ولي اعمال
عارف بنفسي خاطي
هدايتي من الديان
الصح باين والغلط
ولكل انسان خيار
فهمت يا عم الشايب
يالي خربت الديار
حللت وحرمت بمزاجك
وعملت فيها ديان
معروف يا عم المؤمن
كل انسان باخطاء
مفيش انسان كامل
كلنا بشر ضعفاء
خليك انت في نفسك
وبلاش مكر ودهاء
والاول احسن اخلاقك
واحكم ابنك بهاء
وتذكر دايما يا قدوة
اي انسان باخطاء
جرجس فاروق
2014 / 2 / 21

Source URL: https://kfarbou-magazine.com/issue/6799

---