السبت 4 كانون الثاني 2020: موقع مجلة كفربو الثقافية يطلق العدد السنوي 2020م ضمن سلسلةاصداراته وكل عام وأنتم بخير...  * 

أنا لبكيك طول العمر حسان

 

10306545_710158205693320_4693708334998551510_n [640x480]

 

كتب الشاعر ميخائيل تامر  هذه القصيدة في ذكرى الأربعين لرحيل ولده المرحوم حسان :

ع حر الجمر طول الليل بكيان
ما جاني النوم ع فراق الغوالي
أنا لبكيك طول العمر حسان
دموعي عدد ذرَّات الرمالي
يا ابني هالدهر يا حيف خوان
بعض أحيان بيدمّر عيالي
ناحت ميمتك بكيوا الخلان
حتى ولولوا عمام وخوالي
بربيع العمر يا بني كنت مرضان
موتك شب ما بيخطر ع بالي
يا ابني شهر كنت عليل سهران
ما غمضت عين يا زين الرجالي
سرقني النوم مرة كنت غفيان
فقت مرعوب عم ببكي لحالي
خيِّ مات عشت الهم وحزان
يا ابني تموت بمراض العضالي
سوء الحظ ما بيرحم إنسان
العنب بيبسو عالي الدوالي
تاري الموت ع المسكين سلطان
أحكامو ترى تهد الجبالي
أنا بحبك يا ابني كنت ولهان
أكيد الموت ما بيقطع وصالي
فيك الأمل يا ابني كان منصان
ع راسي تاج عنوان الكمالي
عشت عمري بحبك كنت سكران
صحيت وبعد موتك ساء حالي
ما هو كتير لو بسوح عريان
بزورو للقبر حافي النعالي
احفروا لي القبر جنبو نكون جيران
حتى سامروا بعتم الليالي
حياتي بظن ما عادا بالإمكان
لجنبك بالقبر حط الرحالي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *