يا كفربو انتي الدني
بروحي وقلبي ساكني
انتي الزمان انتي المكان
انتي هالعمر الهني…
♥ ♥ ♥
يا بيدر أخضر بنيسان
فيه الطفولة مكنكنة
طفل يلعب وفرحان
مش عارف همك يا دني
يرجع عبيتو تعبان
تيداوي جروح الولدني…
♥ ♥ ♥
يا سهول القمح و الخيرات
زيتون و تفاح و أكيدني
كفربو مواسم حزيران
و عيون حلوي ملوني
من الجفلة تقطف العنبات
و الكاس بالحبة كامني
و قصص جدي عن غابر الأزمان
ريحة غار بالمجد مكوني…
♥ ♥ ♥
كفربو حبق و أعياد
تضوي ليالي داكني
و زيارة لعند الخلان
تكللها طفلة مزيني
كبرت و حرقت الأغصان
و ما عاد فيي تعتني
و حلوة تطل من الشباك
بعيونا المحبة ساكني
أعراس و مشاوير و ألحان
و خصور تلوي و تنحني
وغمزة تروي الولهان
من هاك الصبية الفاتني
سهرات الأحبة و الجيران
قصايد بعدا مدوني…
♥ ♥ ♥
و بأعيادك يا ابن الانسان
كفربو لمجدك تنحني
كنايس ترتل الألحان
و محبة بكل مطرح ساكني
بيوت تعمر بايمان
سنة من بعدها سني…
♥ ♥ ♥
كفربو يا حكاية الخلان
تعبنا من الغربة يا دني
راحو الأحبة يا ضيعان
فراقن هلكني و هدني
يا ترى بترجع الأوطان
و سهرات حلوة و دندني
وبترجع حبيبة زمان
طفلة شقية مولدني
و حدك يا ربي القدران
تفرج علينا و تعتني…